O alcalde de Vigo, Abel Caballero, puxo este venres a primeira pedra das obras da segunda fase das ramplas de Gran Vía, que contarán cun orzamento de máis de 4,2 millóns de euros para instalar dous novos tramos entre a rúa Venezuela e Praza España.
Así, tal como informou o rexedor, o prazo estimado para acometer a actuación será de oito meses e espérase que parte do orzamento proveña dos fondos Next Generation da Unión Europea.
En total, a renovación da Gran Vía, entre o cruzamento con Urzaiz ata Praza de España custaría case 10 millóns de euros. Desde este venres xa se atopa cortado un carril de ascenso da rúa polo inicio das obras.
Estas novas ramplas contarán cun pavimento descontaminante e un novo xardín, tanto interior como exterior. Tamén se renovarán as redes de saneamento, abastecemento e pluviais, entre outras.
