O alcalde de Vigo, Abel Caballero, emprazou a que se redacte o informe dos arqueólogos para saber que son e que se fará cos restos achados nas obras de Porta do Sol, en concreto, na parte baixa de Elduayen.
En rolda de prensa, o rexedor explicou que hai que esperar a este documento para saber de que se tratan, que valor arqueolóxico teñen e que solución pódeselles dar.
Caballero defendeu que todas as obras de Porta do Sol e Elduayen contan cun control arqueolóxico “continuo, constante e permanente” desde o momento no que se iniciaron. Para iso, o Concello contratou unha empresa para que fixese dito control, contando coa supervisión dos arqueólogos da Xunta de Galicia.
Ademais da bóveda e o túnel que se atopan en Policarpo Sanz, os cales xa eran “perfectamente coñecidos” e estaban recollidos no proxecto da obra de Porta do Sol, agora apareceron en Elduayen o que parecen unhas antigas cimentacións de edificios.
Para pescudar de que se trata, estanse comparando con planos antigos de entre os anos 1770 ata os 1890. A partir de mañá mesmo a empresa redactará un informe, a partir do cal o Concello tamén escribirá outro documento que será enviado á Xunta para saber como proceder.
Abel Caballero aproveitou para informar de que o novo túnel de Porta do Sol xa está “practicamente feito na súa totalidade”. A nova praza prevese que estea lista para este verán.
