A Garda Civil retirou da venda case 1.500 xoguetes que foron requisados na provincia de Pontevedra por non reunir as condicións esixidas de seguridade nas diferentes directivas do Consello Europeo, segundo informaron fontes do Instituto Armado.
Estas intervencións tiveron lugar no marco dunha campaña de inspeccións desenvolvidas nos últimos dous meses en diferentes locais da provincia, tanto en establecementos almacenistas como en bazares polo miúdo, onde se venden xoguetes a baixo custo e maioritariamente rexentados por cidadáns de orixe asiática.
Así, os efectivos de Patrulla Fiscal e de Fronteiras detectaron irregularidades en 13 dos 42 establecementos inspeccionados, que deron lugar á tramitación de 13 actas por infraccións administrativas de contrabando. Como consecuencia, os axentes incautáronse de 1.486 xoguetes, na súa maioría de orixe chinesa, ao non acreditarse a súa legal adquisición e lícita importación.
Do mesmo xeito, formuláronse 42 actas por diferentes infraccións en materia de seguridade e consumo, relativas ás marcas, etiquetas e envases. Tamén se detectaron algúns xoguetes provistos de láser sen a correspondente inscrición informando sobre o seu perigo e clasificación de risco.
A totalidade dos xoguetes intervidos, cuxo valor ascende a uns 7.900 euros, foron precintados e postos a disposición das autoridades competentes, mentres que as denuncias foron remitidas ao Departamento de Aduanas e Impostos Especiais de Pontevedra, así como aos organismos competentes en consumo da Xunta de Galicia.
