Zona Franca de Vigo celebrou este mércores unha xornada de internacionalización para axudar ás empresas a acceder ao mercado de México, polo que un total de 42 compañías de sectores como o naval, o metal, a alimentación, o téxtil ou a enxeñaría, entre outros, participaron no encontro.

Tal como informou Zona Franca nun comunicado, a primeira xornada de internacionalización que se celebra na nova sede do Consorcio en Areal foi inaugurada polo delegado do Estado, David Regades, e contou cos responsables de dous grupos vigueses de referencia: Grupo Marsan e GOC.

“En Zona Franca de Vigo temos no noso ADN o apoio á economía e o comercio internacional”, reivindicou Regades, sinalando que Vigo, e con ela a provincia de Pontevedra, “é unha das provincias máis exportadoras de España”. “De xaneiro a outubro de 2021 foi a sexta e en 2020 foi a quinta, supondo máis do 4% do comercio internacional español, con México entre os nosos principais socios comerciais”, engadiu.

As xornadas dos mércores de internacionalización forman parte da programación habitual da Zona Franca, que conta ademais co programa ViaExterior para apoiar a internacionalización de empresas.