O novo viario de Vigo, que conectará a A-55 coa rúa Clara Campoamor, afectará a entre 4 e 11 vivendas, polo que o Concello tratará de recolocar aos veciños preto das súas casas actuais. Así o sinalou este mércores en rolda de prensa a cuarta tenente de alcalde e concelleira de Urbanismo, María José Caride Estévez, quen recoñeceu que esta nova estrada, que se recolle no Plan Xeral de Ordenación Municipal (PXOM) creou unha oposición veciñal coa creación dunha plataforma na súa contra.
Neste sentido, sinalou que máis do 50% deste viario, que terá unha lonxitude dun catro quilómetros, circulará a través de túneles ou viadutos, “tentando minimizar o impacto que produce sobre a contorna”.
Caride quixo contextualizar que este viario, que pasa polas parroquias de Castrelos, Beade e Bembrive, entre outras, afectará a entre 4 e 11 vivendas. “O grao de afectación a chan residencial é un grao que está acoutado”, reivindicou, tras o que engadiu que “obviamente” os veciños teñen que ser atendidos.
Neste aspecto, explicou que o Concello buscará a posibilidade de que os afectados poidan recolocarse na súa contorna, dando a posibilidade de crear chans urbanizables ou chans urbanos non consolidados, dos cales será o propio concello o promotor e que permitirá ás persoas trasladarse a el.
