Galicia supera os 67.700 casos activos de Covid-19 ao situarse en 67.724, despois de rexistrarse outros 4.966 novos contaxios –619 menos que o día anterior–. Isto supón case seis veces máis de contaxiados que os que tiña Galicia hai un mes, cando había 10.670.  Tampouco a situación en Vigo é mellor, xa que aumentan os casos diarios e os ingresos hospitalarios.

Segundo os datos actualizados na mañá deste luns pola Consellería de Sanidade, con rexistros ata as 18,00 do domingo, descenden a 53 as persoas ingresadas en UCI pola Covid-19 en Galicia –dúas menos– mentres que aumentan a 449 as hospitalizadas noutras unidades –55 máis–.

Por áreas sanitarias, a presión hospitalaria aumenta nas sete. Así, na de Vigo descenden a 12 os críticos –tres menos–, pero increméntanse a 92 os doutras unidades –11 máis–.

CASOS EN AUMENTO

Os casos activos de Covid-19 continúan en aumento en Galicia e ascenden a 67.724, que supoñen 2.389 máis que a xornada anterior, o que implica un incremento menor que o día pasado, ao haber de novo máis contaxios (4.966) que altas (2.575), ao que se engaden dous falecidos.

A área sanitaria de Vigo rexistrou 348 casos máis e segue sendo a que máis ten de Galicia, con 15.199 contaxiados.