A sexta onda da pandemia da covid-19 en Galicia superou xa os picos do cinco anteriores, ao contabilizar xa máis de 24.000 casos activos. A anterior cifra máis grande deuse o 29 de xaneiro deste ano, cando había 22.909 pacientes de coronavirus.

En concreto, segundo os datos publicados este domingo 26 de decembro, con rexistros ata as 18,00 do sábado 25, o Servizo Galego de Saúde (Sergas) contabiliza 24.525 casos activos da enfermidade, tras subir en 1.903 nas últimas 24 horas analizadas. Deles, a maior parte, na área de Vigo.

Esta subida replicouse no último día en todas as áreas sanitarias cunha única excepción, a de Ourense-Verín-O Barco de Valdeorras. No lado oposto sitúase, en primeiro lugar, a de Vigo, con 7.075 pacientes, tras unha subida de 677 nun só día.

CASE 1.000 NOVOS CASOS

No que respecta ás novas infeccións, a cifra de 2.778 supón un respiro despois de tres días consecutivos de marca en Galicia. Son 322 contaxios detectados menos que o día previo, cando houbo 3.100. De todos os positivos notificados nas últimas 24 horas, a área de Vigo acumula 933.

PRESIÓN HOSPITALARIA

A pesar das cifras de marca tanto en contaxios como en casos activos, a presión hospitalaria mantense máis ou menos estable, ao sumar nas últimas horas só tres ingresados máis, ata os 278 en total. Deles, 219 están en planta –dúas menos– e 55 en unidades de coidados intensivos –cinco máis–.

Por áreas sanitarias, tan só na de Vigo descendeu a presión asistencial, ata os 78 hospitalizados en total (-2). No entanto, a súa UCI contabilizan nos datos deste domingo 14 enfermos covid (+2).