A presidenta do PP de Vigo, Marta Fernández-Tapias, apostou por construír “unha alternativa sólida e eficaz” ao goberno local e “un partido unido”.
Nunha carta á militancia, asegurou que, tras o XIII Congreso Local no que foi elixida presidenta, asumiu con “humildade”, “espírito de servizo” e “toda a enerxía” o cargo e avogou por crear unha “alernativa” ao goberno municipal desde o partido.
Ademais, insistiu en que “no PP todos son necesarios” independentemente da persoa á que apoiasen no congreso e afirmou que é momento de “volver crer, de volver ilusionarse e de porse a traballar”. “Non me resignarei a que sexamos unha forza política residual na nosa cidade. Pola miña banda prométovos traballo, lealdade, diálogo, dedicación e esforzo”, afirmou.
Fernández-Tapias manifestou que aspira a “buscar a proximidade con todos os vigueses” e a gañar “o aprecio, respecto e confianza” dos militantes, tras o que defendeu que “entre todos” serán capaces de “renovar a súa ilusión, sumar cada día a máis xente ao seu proxecto e obter os resultados que se queren”.
Neste sentido, augurou que no novo camiño comezado “conta con todos para devolver ao Partido Popular de Vigo ao lugar que xa ocupou no pasado” e “sen queixas nin lamentacións”.
CRÍTICAS DO PSOE
Pola súa banda, en declaracións remitidas aos medios, a secretaria executiva do PSdeG-PSOE e membro da executiva local de Vigo Patricia Rodríguez Calviño tachou de “nefasto” o congreso celebrado o pasado sábado polo PP, que considerou que foi “teledirigido” polo presidente da Xunta e o PPdeG, Alberto Núñez Feijóo, e o presidente provincial do partido, Alfonso Rueda.
Así, advertiu de que Fernández-Tapias “se vai prestar facerlle publicidade a Feijóo”, o que implicará “un resultado nefasto” e “sempre en contra dos intereses da cidade”.
