O candidato á Presidencia do PP de Vigo Javier Guerra avogou por un partido “aberto e unido” sen “datas de caducidade” e afirmou que promoveu un encontro “cara a cara” coa outra aspirante, Marta Fernández Tapias, á que “ofreceu integrarse na proposta de Vigo Nos Une” e, “en calquera caso, manter aberta a vía do diálogo”.
Así se manifestou o exconselleiro e actual senador este martes, días despois de coñecerse que Fernández-Tapias lle ofreceu a configuración dunha candidatura “de integración”, na que se reservarían 8 dos 20 postos da Executiva para xente do seu equipo e, para el, o posto de vicepresidente.
A este respecto, Guerra lamentou recibir “algo que podería interpretarse como unha contra-proposta a través dos medios de comunicación” e recalcou que “a vía seria e formalmente adecuada” para este tipo de conversación é “un encontro entre compañeiros”. Así, considerou que unha resposta a través dos medios “só pode ser interpretada como unha negativa á proposta de seguir falando”.
Así mesmo, Guerra sinalou a unidade como un obxectivo urxente para o PP, pero descartou limitalo ao XIII Congreso Local, que terá lugar este sábado. Por iso, garantiu que, se se converte no próximo presidente do PP local, manterá aberta a vía da unidade e a integración, que ve “o único camiño para fortalecer ao partido”.
ATENCIÓN AOS AFILIADOS
Tamén recalcou que todos os candidatos deben considerar urxente “atender aos afiliados e garantirlles que reciben toda a información necesaria en relación co proceso de votación ao que foron convocados”.
Nesta liña, trasladou o seu apoio aos afiliados que se dirixiron ao partido para solicitar información sobre o número de persoas con dereito a voto e a convocatoria dunha sesión na que os candidatos poidan explicar as súas propostas, así como para reclamar facilidades para regularizar o estado das súas afiliacións e votar.
Adicionalmente, o senador Javier Guerra reiterou a importancia de garantir o crecemento do partido e a máxima participación cun proxecto con propostas para Vigo e elaborado desde esta cidade. Así, insistiu en que “este non é o momento de falar de cargos, senón de propostas”.
