O Pleno do Concello do Porriño tomará coñecemento formalmente este xoves da dimisión de Eva García de la Torre, ata hai uns días alcaldesa socialista deste municipio, e que renunciou ao seu cargo para evitar unha moción de censura acordada entre PP e EU-SON que deixaría o goberno local en mans da dereita.
García de la Torre formalizou a súa dimisión ante o rexistro municipal o pasado 23 de novembro, tras comparecer nunha rolda de prensa na que lamentou que deixaba a Alcaldía tras os ataques recibidos “por ser muller, e diferente”, e na que confirmou que non deixaría a súa acta de concelleira, pasando a ser portavoz do seu grupo.
A partir deste xoves abrirase un novo prazo de 10 días laborables ata a convocatoria dun novo Pleno, nesa ocasión, xa de investidura, o próximo 23 de decembro, para que os grupos voten ao que será novo alcalde ou alcaldesa do Porriño.
No momento en que García de la Torre confirmou a súa dimisión, avanzou que a candidata do seu grupo para substituírlle sería a edila socialista Lourdes Moure. No entanto, tanto EU-SON como BNG (socios no goberno local de coalición) advertiron de que tería que abrirse un período de negociación.
De feito, non parece nada claro que Moure vaia a ser investida alcaldesa, tendo en conta de que para iso sería necesario o voto de Manuel Carrera (Unión Democrática da Louriña), e este trasladou que só apoiaría unha investidura de David Alonso, número 4 do PSOE.
