O deputado Galicia en Común no Congreso Antón Gómez-Reino pediu á ministra para a Transición Ecolóxica e o Reto Demográfico, Teresa Ribera, que “protexa a ría de Vigo e a súa riqueza ambiental” ante o proxecto de ampliación da terminal portuaria de Bouzas da Autoridade Portuaria.
Así se manifestou a través dunha carta remitida á ministra o deputado de Galicia en Común, que rexistrou unha iniciativa parlamentaria sobre o prego de bases de licitación de asistencia técnica para a redacción do proxecto para ampliar a terminal de Bouzas, na súa fase 1.
Gómez-Reino alertou do impacto ambiental que podería levar a actuación nun espazo que conecta o interior da ría e o mar aberto e en cuxo interior se atopa a Zona Espacial de Conservación (ZEC) Enseada de San Simón. De feito, afirmou que podería afectar á actividade pesqueira e marisqueira.
Tamén preguntou ao Goberno sobre a validez do impacto ambiental da Fase 1 e as razóns de que non se inclúan as próximas obras. “A situación é moi delicada e a falta de protección e de responsabilidade por parte da Xunta de Galicia fai que teñamos que pedir ao Goberno que protexa a ría de Vigo e a súa riqueza ambiental”, afirmou.
