Axentes da Policía Autonómica da xefatura de Vigo, en colaboración con efectivos da Unidade de Investigación de Incendios Forestais, identificaron a unha muller como presunta autora dun incendio ocorrido no municipio pontevedrés de Arbo.

Segundo informaron fontes de Vicepresidencia da Xunta, o lume declarouse o pasado 14 de novembro no lugar da Granxa e afectou a 0,3 hectáreas de monte arboledo e monte raso.

As investigacións apuntan a que a orixe estivo nunha posible neglixencia desa muller, á hora de realizar unha queima de restos de poda. As dilixencias practicadas por estes feitos foron remitidas ao xulgado de instrución número 3 de Ponteareas.

No que vai de ano, a Policía Autonómica investigou a 33 persoas como presuntas autoras de incendios forestais en Galicia.