O grupo municipal do PP de Baiona denunciou este venres a anulación de cinco sancións impostas pola Policía Local ao alcalde desta localidade, Carlos Gómez Prado, por estacionar o seu coche particular en zona de carga e descarga, e sinalou que o propio rexedor asinou os decretos de anulación das multas, despois de que fosen estimadas as súas alegacións.

Nunha rolda de prensa, o portavoz do grupo, Ángel Rodal, explicou que o PP descubriu eses decretos nunha comisión informativa previa ao pleno do pasado 16 de setembro. Así, preguntou ao rexedor na sesión plenaria por esas multas e, sinalou, o alcalde recoñeceu que lle puxeron as sancións por estacionar en zona de carga e descarga en horario non permitido pero que presentara alegacións e estas estimáronse, polo que a retirada das multas cumpre coa legalidade.

Respecto diso, Ángel Rodal afirmou que o argumento empregado polo alcalde para oporse ao pago das sancións (que sumaban 880 euros) foi que tiña un cartón que lle permitía estacionar nesa zona, pero que “se lle esqueceu” colocala no vehículo.

O portavoz do PP criticou que “nunca antes ningún alcalde” de Baiona tivo un cartón que lle autorice a aparcar en zonas reservadas, o que supón “un privilexio”. En todo caso, precisou que o cartón á que alude o rexedor, “se existe”, non lle faculta para estacionar en zona de carga e descarga, senón para facelo nun tramo reservado da rúa Elduayen.

Anxo Rodal tamén denunciou que, tras semanas reclamando os expedientes das sancións, tanto ao Concello como ao servizo ORAL da Deputación de Pontevedra (que xestiona as multas), estes non lle foron facilitados ao seu grupo.

Para o concelleiro ‘popular’ a actuación de Carlos Gómez Prado supón “unha falta de respecto aos veciños” de Baiona, que se queren estacionar os seus coches preto do Concello deben facerse un abono no aparcadoiro municipal. “Os representantes públicos temos que cumprir a lei (…), os veciños pídennos que deamos exemplo”, sentenciou.