O corpo dunha muller de idade avanzada foi localizado flotando na auga na mañá deste martes xunto a unha praia no municipio de Bueu. Segundo informou o 112 Galicia, un particular avistou o corpo que flotaba na auga, que foi rescatado por efectivos dos Bombeiros do Morrazo.

O achado tivo lugar sobre as 12,10 horas deste martes. Unha persoa particular chamou ao 112 Galicia para informar de que vía un corpo tirado nas rocas, no lugar do Cabo Udra, en Beluso, na praia de Ancoradouro. Por iso, os xestores do 112 puxeron os feitos en coñecemento do persoal sanitario, dos axentes da Policía Local, da Garda Civil e dos Bombeiros. Ademais, foi informado persoal de Salvamento Marítimo e do Servizo de Gardacostas de Galicia.

Tras chegar ao lugar, os bombeiros comprobaron que o corpo estaba a flotar na auga, entre as rocas, e indicaron que procedían ao seu auxilio. Despois de ser rescatado, confirmaron que se trataba do cadáver dunha señora de avanzada idade, polo que, as forzas da orde investigan os feitos para esclarecer o sucedido.