O novo secretario xeral electo do PSdeG, Valentín González Formoso, agradeceu “enormemente” o “esforzo” realizado pola alcaldesa socialista do Porriño, Eva García, ao mostrarse disposta a renunciar ao cargo para evitar unha posible moción de censura.

“O xesto que fai a alcaldesa déixaa en moi bo lugar, demostra o que é o bo socialismo, o compromiso coa sociedade, que isto non é unha cuestión persoal senón de proxecto, de compromiso cos veciños e veciñas do Porriño”, afirmou.

Preguntado respecto diso nun acto en Ames, considerou que coa posible moción de censura que negocia o Partido Popular con EU-SON “perverte a vontade popular”. “Creo que os votos da esquerda deben de fortalecer os proxectos de esquerda e os votos da dereita os proxectos de dereitas”, sostivo. Tras iso, lembrou que só quedan “18 meses” para as eleccións municipais polo que considerou que situar ao Porriño nun proceso de “inestabilidade” durante 18 meses responde máis “a un capricho político” que a unha “vontade” de querer cambiar as cousas.

“Pediría un pouco de altura de miras, que 18 meses pasan rápido e os veciños poderán dar a súa opinión sobre a xestión do Porriño”, sostivo.