O Centro Tecnolóxico do Mar-Fundación Cetmar, dependente da Consellería do Mar, conmemorou o seu vixésimo aniversario tras participar en case 600 accións de investigación mariña desde a súa posta en marcha.
Así, a sede do Cetmar en Vigo acolleu este venres un acto conmemorativo no que participaron a secretaria xeral técnica da Consellería do Mar, Silvia Cortiñas; a delegada territorial da Xunta, Marta Fernández-Tapias, e a directora-xerente do Cetmar, Paloma Rueda.
A través do evento, ao que tamén asistiron membros do Padroado da Fundación e antigos directores, socios, colaboradores e traballadores, reivindicouse o labor realizado desde 2001 para a mellora do medio mariño, así como dos seus recursos e os sectores vinculados ao mesmo cun fomento da innovación e a sustentabilidade.
Neste contexto, Silvia Cortiñas resaltou o papel do centro tecnolóxico como aliado do mar de Galicia e en particular dos seus profesionais. En concreto, explicou que se levaron a cabo proxectos centrados na protección do litoral galego mediante a loita contra a contaminación mariña, a prevención e mitigación de residuos mariños e a vixilancia da contorna.
COLABORACIÓN CON MÁIS DE 1.800 SOCIOS
Durante a súa traxectoria, esta institución traballou con máis de 1.800 socios de case 60 países e colaboradores de ámbitos da investigación, a universidade, a Administración e empresas e entidades vinculadas ao sector marítimo-pesqueiro.
O labor do Cetmar incluíu ademais a cooperación internacional nunha vintena de países de África e América Latina, ademais da súa participación en numerosos consorcios cun equipo de case 300 traballadores.
As liñas de traballo da institución comprenden a loita contra a contaminación mariña, a xestión sustentable de recursos mariños, a posta en valor de subproductos, a seguridade alimentaria e a monitorización mariña e costeira. Paralelamente, abordáronse o desenvolvemento de novas tecnoloxías para o estudo mariño, a formación marítima e a divulgación da cultura oceánica e o coñecemento no ámbito da socioeconomía da pesca.
