O comité de empresa de Vitrasa, concesionaria do bus urbano de Vigo, denunciou este luns a vulneración do dereito á folga tras imporse uns servizos mínimos “abusivos”, con motivo dos paros parciais que convocaron a partir desta semana, para denunciar os incumprimentos do convenio por parte da empresa.
Os traballadores iniciaron este luns unha serie de paros parciais (entre 7.30 e 9.30, de 13.00 a 15.00 e de 19.00 a 21.00 horas, de luns a venres) para denunciar, entre outras cuestións, xornadas de 10 horas, modificación de condicións, e tempos escasos para cubrir as rutas. Segundo trasladaron, na primeira xornada de protesta os paros tiveron “un amplo seguimento”.
Con todo, criticaron os servizos mínimos establecidos e anunciaron que impugnarán o decreto do goberno local, segundo comunicou a CIG. O sindicato lamentou que eses servizos mínimos son do 60,8 %, superiores aos do 50 % que se aprobaron para a folga do pasado mes de agosto, e iso a pesar de que actualmente o aforamento permitido nos buses é superior ao de entón, e tendo en conta que son paros parciais e non folga total.
Por outra banda, denunciaron que o Concello incrementa aínda máis eses servizos mínimos “de modo encuberto”, xa que obriga aos condutores que se atopan en ruta no momento dos paros a que finalicen dita ruta. Por iso, concluíron que os servizos mínimos elévanse ata o 80 % nalgúns casos.
“Deste xeito o goberno local impide o noso lexítimo dereito de folga cuns servizos mínimos desproporcionados que, ademais, están feitos á carta, que parece mesmo que os fixo a propia empresa“, denunciou o comité.
Así mesmo, apuntaron que o goberno local non consultou eses servizos mínimos cos representantes dos traballadores, “de igual maneira que o alcalde leva 7 anos negándose a recibir ao comité de de empresa”.
