O Concello de Pazos de Borbén acaba de poñer en marcha a segunda fase do seu plan de recuperación e conservación do patrimonio. O proxecto ten como obxectivo recuperar antigas zonas de uso colectivo, como as fontes e lavadoiros, para darlles unha nova vida.
Os traballos comezaron esta semana no lavadoiro da Ermida, cuxa recuperación será financiada con medios propios do concello de Pazos de Borbén. O plan municipal de conservación do patrimonio de Pazos de Borbén inclúe a restauración de cinco lavadoiros dividida en dúas fases: a primeira, xa realizada, na que se restauraron os de Amoedo e Moscoso, e unha segunda na que se traballará nas parroquias de Xunqueiras, Pazos e A Ermida, onde xa comezaron os primeiros labores de limpeza e rehabilitación.
Os traballos variarán segundo as necesidades de cada actuación e centraranse na recuperación dos principais elementos dos lavadoiros e a súa contorna. Ademais, eliminaranse os partes non recuperables substituíndoas por pedra do país, que será o material máis usado en todas as renovacións para garantir a súa integración coa contorna orixinal.
As actuacións encadradas no plan municipal para a recuperación do patrimonio histórico local de Pazos de Borbén tratan de recuperar puntos que servían tradicionalmente como lugar de encontro entre os veciños, “nos que se compartían experiencias e se fortalecía a comunidade”, explica o alcalde de Pazos de Borbén, Andrés Iglesias.
Do mesmo xeito, o edil indicou que “solicitamos subvencións á Deputación de Pontevedra para o resto de actuacións, pero aínda que aínda non sabemos se nos serán concedidas ou non, e independentemente da cantidade, terminaremos todos os traballos previstos no plan de recuperación do patrimonio”.
