O alcalde de Vigo, Abel Caballero, asegurou que “se segue adiante” co proxecto da Zona Franca, que el mesmo preside, para que o sur de Galicia acolla unha fábrica de baterías.
Así se pronunciou, despois de que o grupo automobilístico Stellantis, que conta cunha planta en Vigo, confirmase a terceira planta de baterías para Italia e outras dúas en Norteamérica.
A este respecto, o rexedor asegurou que “xa sabía que Stellantis ía abrir unha fábrica de baterías en Italia”. En todo caso, remarcou que “se segue adiante” coa proposta realizada para instalar unha planta na Plataforma Loxística de Salvaterra-As Neves, dado que resulta “imprescindible que haxa polo menos unha en España” e garantiu que “se vai seguir traballando ata o final” neste sentido.
Mentres, criticou que a Xunta expuxese nun acto ante Stellantis que a comunidade acollese unha fábrica de baterías pero “non estea á impulsar”. Ademais, apuntou que o proxecto no que participou a Zona Franca foi remitido no seu momento ao Goberno de España.
En concreto, o pasado mes de marzo, o Consorcio da Zona Franca de Vigo, o Concello e a Deputación de Pontevedra presentaron o Manifesto de Interese do proxecto para implantar na comarca unha fábrica de baterías para vehículos eléctricos, co que pretendían captar fondos europeos de recuperación (Next Generation).
