O Global Ranking of Academic Subjects (GRAS) 2021, coñecido como ‘Ranking de Xangai by Subject’, sitúa a Universidade de Vigo (UVigo) entre as institucións de referencia en 14 categorías, dúas máis que no ano anterior, segundo informou a universidade viguesa.
Así, destaca a posición que ocupa en Ciencia e Tecnoloxía dos Alimentos, no posto 51 (empatada a puntos con outras 24 institucións). Ademais, inclúese por primeira vez como unha das 500 universidades referentes nos ámbitos de Educación e de Farmacia e Ciencias Farmacéuticas; e volve estar presente con Enxeñaría Civil entre as 300 mellores institucións. No entanto, a UVigo deixa de ter presenza na categoría de Ciencias e Enxeñaría da Enerxía.
En concreto, a universidade viguesa en Oceanografía sitúase entre as 150 mellores; en Xestión Turística, Enxeñaría de Telecomunicación e Enxeñaría Civil entre as 300 mellores; en Ecoloxía, Ciencias Atmosféricas, Enxeñaría Eléctrica e Electrónica, entre as 400 mellores; e en Ciencias da Terra, Enxeñaría Química, Biotecnoloxía, Ciencias Agrícolas, Educación e Farmacia e Ciencias Farmacéuticas entre as 500 mellores.
Estes datos supoñen que a universidade viguesa mellora en Ecoloxía, que pasa do bloque das 500 ao das 400 mellores; mentres que descende en Oceanografía (do bloque de 76-100 ao de 101-150), en Enxeñaría de Telecomunicación (do 151-200 ao 201-300) e en Enxeñaría Química (do 301-400 ao 401-500).
Sobre os descensos rexistrados na última clasificación do ‘Ranking de Xangai by Subject’ –que avalía ás universidades do mundo por ámbitos de investigación–, a vicerreitora de Investigación da UVigo, Belén Rubio, manifestou que “as baixadas poden ser conxunturais e haberá que examinalas a máis longo prazo”.
En todo caso, subliñou que a clasificación da universidade “é relevante e moi positiva, en comparación cos anos precedentes” e “tendo en conta que aínda é unha universidade nova e cun financiamento modesto”. Neste sentido puxo en valor que os datos “reflicten a boa saúde da institución na investigación máis punteira en cada un dos seus campus”.
