O Goberno de Vigo manifestou que é “inconcibible” que a Xunta “conscientemente siga infrinxindo” a ordenanza municipal coa colocación dun cartel na fachada do albergue de peregrinos construído pola Administración autonómica no Berbés, na cidade olívica.

Así se pronunciou despois de que o vicepresidente e conselleiro de Presidencia, Turismo e Xustiza, Alfonso Rueda, lamentou este luns que “non ten moita explicación” que o Goberno local “no canto de celebrar a apertura dun albergue na cidade, só se preocupa por un cartel“. “É unha mostra máis da relación de odio do alcalde co Camiño de Santiago”, resolveu.

Nun comunicado remitido na tarde deste luns, o concelleiro socialista Abel Losada indicou que “lamenta a falta de respecto da Xunta aos cidadáns de Vigo, incumprindo normas urbanísticas que deberían acatar como todos os vigueses”.

“A Xunta insulta aos vigueses ao manter un cartel que contravén as normas; considéranse superiores aos cidadáns e desde o Concello esiximos que cumpran as normas ás que todos nos vemos supeditados”, recalcou.

Neste sentido, asegurou que Rueda “xa deu mostra da animadversión que sente por esta cidade cando se manifestaba en contra de Vigo para que o xulgado do mercantil marachara para Pontevedra”. A iso agregou que “o maior insulto” é que a Xunta “dedique centos de miles de euros a Santiago e nin un só céntimo á cidade de Vigo”.