Os pacientes ingresados pola Covid-19 na Comunidade galega caeron por baixo dos 200 ata os 190, que supoñen 19 menos que a xornada anterior, mentres que os novos contaxios descenderon a 121, unha trintena menos que no inicio desta semana, a primeira tras decaer o estado de alarma o domingo. Pola súa banda, os casos activos seguen coa tendencia descendente e caen a 2.977.

Segundo os datos actualizados na mañá deste martes pola Consellería de Sanidade con rexistros ata as 18,00 horas deste luns, os pacientes Covid ingresados en UCI descenden a 43, tres menos, e os que permanecen noutras unidades redúcense a 147, que implican 16 menos.

Por áreas sanitarias, na de Vigo seguen 14 en críticos e descenden a 31 os doutras unidades –nove menos–.

MENOS CASOS ACTIVOS

En canto aos casos activos encadean cinco xornadas consecutivas en descenso e sitúanse en 2.977, que implican sete menos que o día pasado, ao haber de novo máis altas (128) que contaxios (121). Por áreas sanitarias, na de Vigo mantéñense e segue á cabezam con 825 casos activos.

BAIXAN OS CONTAXIOS

Pola súa banda, os novos contaxios de Covid-19 detectados con calquera tipo de proba na Comunidade galega seguen a tendencia descendente do inicio desta semana e baixan a 121 tras arrincala con 152, que supoñen 31 menos. Do total de novos positivos, 103 foron confirmados por PCR nas últimas 24 horas no conxunto de Galicia, deles 14 na área de Vigo.

Ademais, Galicia realizou 2.134.205 PCR desde o inicio da pandemia, que supoñen 8.187 probas máis que as rexistradas ata a xornada anterior e un milleiro menos que as feitas o día pasado.

En canto á taxa de positividade –porcentaxe de infeccións por test PCR realizados– caeu a un 1,39 por cento tras repuntar un 2,3% no inicio desta semana. Por iso, mantense por baixo do 5% que a Organización Mundial da Saúde (OMS) fixa para dar por controlada a pandemia.