O Consorcio de Zona Franca e a Asociación de Novos Empresarios (AJE) de Vigo presentaron este mércores un programa formativo pioneiro dirixido a pemes e autónomos co que pretenden aportales ferramentas para desenvolverse no mundo dixital, pero tamén “para que aprendan a desconectar”.
No acto de presentación, o delegado de Zona Franca, David Regades, lembrou que no mundo actual, un programa como este é útil para facilitar ferramentas dixitais ás empresas, pero tamén é necesario que as persoas “poidan atopar un equilibrio entre o dixital e elas mesmas”. “Porque detrás da dixitalización das pemes e autónomos hai persoas que necesitan o seu espazo”, subliñou.
Pola súa banda, Iván Suárez Fernández, presidente de AJE Vigo, puxo en valor “a colaboración público-privada para a realización deste programa e o apoio de Zona Franca á empresa e o emprendimiento”.
Trátase dun programa formativo pensado para pemes e autónomos que necesitan incorporar ferramentas dixitais que lles permitan ser máis competitivas e eficientes na xestión dos seus recursos, pero tamén para que os traballadores “aprendan a desconectar”.
A formación dura cinco semanas e cada semana terá unha sesión ‘on’ e outra ‘off’. Así, abordaranse cuestións como o manexo de Whatsapp, a mercadotecnia para pemes e autónomos, os ‘microinfluencers’, ‘Google my business’, ferramentas de cobro en liña ou sobre ciberseguridade (na parte ‘on’) e o control postural, alimentación na contorna laboral ou ‘mindfulness’ (na parte ‘off’)
O programa, que é gratuíto para asociados de AJE e participantes en aceleradoras e viveiros de Zona Franca, comeza o 11 de maio e contará con formadores como Alberto Falcón, Óscar Cumí, José Alcañiz, Roberto González, Álvaro Muzas, Nicolás Piedrafita, Vitoria Ambrós e Cintia Salido.
