Axentes da Policía Local de Vigo recuperaron unha tartaruga en mal estado e unha serpe que se atopaban en plena rúa na cidade, así como unha segunda serpe que foi achada nunha leira privada.
Segundo informou a Policía local, o primeiro animal foi localizado sobre as 17,20 horas do 25 de abril, cando un individuo indicou que se atopou na rúa Coutadas unha tartaruga “en moi mal estado”.
Os efectivos policiais atoparon ao animal á altura da antiga vía do tren, entre desperdicios. Por iso, o recolleron e trasladaron a dependencias policiais para a súa posterior recuperación.
Ao día seguinte, sobre as 23,00 horas unha persoa informou sobre a presenza dunha serpe duns 30 centímetros na rúa Brasil, en pleno centro de Vigo. Trátase dunha especie autóctona, polo que os axentes recollérona e liberárona na súa contorna natural.
Finalmente, ás 13,40 horas do pasado sábado recibiron un aviso de que aparecera unha serpe nunha leira privada do Camiño Galindra. Os axentes localizaron o réptil, unha ‘serpe bastarda’ de 50 centímetros, tras o que a devolveron ao seu hábitat.
