A Xunta de Galicia e a Asociación de Industrias do Metal e Tecnoloxías Asociadas de Galicia (Asime) trasladaron a súa disposición a cooperar para reforzar o impulso transfronteirizo deste sector.
Así o manifestaron ambas as partes tras unha reunión celebrada nas últimas horas, entre o vicepresidente do goberno galego, Alfonso Rueda; o secretario xeral de Asime, Enrique Mallón; o vicepresidente de Asime, Rafael Outeiral; e na que tamén participou a delegada territorial da Xunta en Vigo, Marta Fernández-Tapias.
Segundo trasladou a administración autonómica, a súa intención é apontoar unha cooperación entre Galicia e o norte de Portugal, na que Asime “é precursora”, co fin de establecer sinerxías empresariais.
Entre outras cuestións, Alfonso Rueda abordou coa asociación a mobilización de fondos de Cooperación Territorial Europea (Interreg), aos que socios de Asime concorreron en anteriores ediciciones con proxectos para o desenvolvemento de tecnoloxías intelixentes e para a transferencia e valorización de nanotecnoloxías.
Pola súa banda, o sector metalúrxico galego, segundo expuxo Enrique Mallón, pretende manter o seu “forte vínculo” coa industria do metal do país veciño, e lembrou que Asime lanzou varias iniciativas conxuntas exitosas con empresas portuguesas, como a Federación Luso Galaica de Industrias do Metal.
Mentres, Rafael Outeiral explicou que a industria galega do Metal quere dar a coñecer todo o seu potencial na próxima edición da feira MindTech, que se celebrará en setembro en Vigo. Este evento pretende ser un “gran escaparate” do impulso do sector, e pór en valor a recuperación desa industria e as súas tecnoloxías no ámbito do Polo Ibérico e da industria 4.0.
