A veciña de Vigo acusada de enganar a mulleres vulnerables, ás que ofrecía emprego doméstico para, xunto ao seu marido (xa falecido), abusar sexualmente delas, aceptou unha pena de 9 anos de prisión, así como pagar indemnizacións que suman 17.000 euros, en virtude dun acordo de conformidade que evita a celebración do xuízo contra ela (previsto para este martes e este mércores na sección quinta da Audiencia Provincial de Pontevedra, con sede na cidade olívica).

A Fiscalía pedía inicialmente penas que sumaban 37 anos de cárcere ao considerala cooperadora necesaria en cinco delitos de abuso sexual con introdución de obxecto, con engano, abuso de superioridade e abuso de situación de necesidade. Así mesmo, atribuíalle un delito de agresión sexual con intimidación; un delito de detención ilegal; un delito de trata de seres humanos con engano, con fins de servidume e explotación laboral, en concurso cun delito de detención ilegal e un de agresión sexual; e un delito de malos tratos de obra. A eles sumábase un delito contra os dereitos dos traballadores.

Tras o acordo, a acusada aceptou un ano de prisión por cada un dos cinco delitos de abuso sexual, cinco meses polo delito de agresión sexual, tres meses por un delito de coaccións, tres anos de cárcere por un delito de trata, e catro meses por un delito contra os dereitos dos traballadores.

A muller tamén deberá pagar unha multa de 180 euros polo delito leve de malos tratos e deberá indemnizar en 1.000 euros a cada unha do cinco vítimas de abusos sexuais; e noutros 6.000 euros a cada unha das dúas vítimas de agresión sexual.

MULLERES VULNERABLES

Os feitos remóntanse aos meses de marzo a outubro de 2019 cando, segundo a Fiscalía, a acusada e o seu marido contactaron a través dunha páxina web de anuncios con sete mulleres de diferentes países suramericanos, todas elas en situación moi vulnerable, ás que ofreceron emprego como traballadoras domésticas e aias da súa filla de 6 anos, prometéndolles que lles pagarían un salario e regularizarían a súa situación administrativa en España.

En todos os casos, mantiveron entrevistas con elas no seu domicilio, na zona de Castrelos, e convencéronas de que, para obter o traballo, debían someterse a un recoñecemento médico que o propio marido lles realizaba, facéndose pasar por profesional sanitario. Ese falso recoñecemento consistía en tocamentos e na introdución dun hisopo na vagina e no ano.

Varias das mulleres non volveron ao piso despois dese ‘recoñecemento’, aínda que polo menos dous delas si chegaron a traballar para o matrimonio. Así, unha muller nicaraguana traballou no piso un día, e obrigárona a desenvolver as tarefas domésticas vestida só con tanga e sostén, advertíndoa de que pertencían a unha perigosa organización de tráfico de drogas e órganos, e que tiñan cámaras instaladas na vivenda, polo que non podería negarse ao que lle pedisen, baixo a ameaza de que poderían facerlle dano a ela ou aos seus fillos.

A acusada tamén hostigaba á muller esixíndolle que mantivese relacións sexuais con ela ou co seu marido, ou que se duchase coa porta do baño aberta, e chegou a golpeala. Ao día seguinte de empezar nese emprego, a vítima aproveitou unha saída para acompañar á acusada a levar á súa filla ao colexio para escapar.

Unha sétima vítima, unha muller colombiana, chegou a traballar para o matrimonio durante 8 días, e tamén foi intimidada e ameazada para non saír do piso e someterse aos desexos de ambos os (ducharse coa porta aberta, traballar en roupa interior ou someterse a supostas exploracións médicas), todo iso no medio dunha atmosfera de terror. A muller estivo nesa situación ata que foi rescatada pola Policía, o 17 de outubro de 2019.

O marido da acusada tamén foi detido por este feitos pero, cando se estaba realizando o rexistro do seu domicilio en presenza da comisión xudicial, o home aproveitou un momento de descoido e, a pesar de estar esposado, abalanzouse contra a xanela da cociña, fracturando o cristal e precipitándose ao baleiro desde o noveno piso. Como consecuencia das graves feridas, o home faleceu.

DETENCIÓNS POR ROUBO

Axentes da Policía Nacional da Comisaría de Vigo detiveron a tres veciños da cidade, de 29, 31 e 36 anos de idade (dous deles de nacionalidade colombiana e outro español) como presuntos autores dun roubo no interior dun vehículo estacionado na rúa.

Segundo informaron fontes policiais, os feitos ocorreron a pasada madrugada, cando unha testemuña alertou ao 091 tras observar a tres individuos na rúa Zaragoza, en actitude sospeitosa observando os vehículos que estaban aparcados.

Os axentes dirixíronse ao lugar e localizaron nas inmediacións a tres homes, cuxo aspecto coincidía coa descrición facilitada. Así mesmo, comprobaron que había un coche na rúa Zaragoza que tiña o cristal do portelo traseiro dereita fracturado e o interior revolto.

O tres homes foron detidos e trasladados a Comisaría, onde se comprobou que algúns deles teñen antecedentes. Os arrestados e as dilixencias practicadas foron postos a disposición do xulgado de instrución de garda.