A Asociación Veciñal de Teis vén de denunciar publicamente que o proxecto de humanización do encontro da rúa Sanjurjo Badía co Barrio das Flores, coa creación dunha nova praza, “suporá a eliminación de ao redor de 20 prazas de estacionamento na zona e agravará o problema da falta de estacionamento en Teis”.

A veciñanza do Barrio das Flores trasladou nunha asemblea veciñal a súa preocupación pola eliminación de prazas de estacionamento nesta zona, que aumentará o problema de estacionamento no Barrio das Flores, “que xa está saturado na actualidade”.

Esta humanización recolle o recuamento dun tramo do muro na rúa Nardos, e na veciñanza hai preocupación, “pois descoñecemos como pode afectar as vivendas do Barrio das Flores lindeiras co muro, debido á escasa cimentación das vivendas construídas a finais dos anos corenta do século XX”.

A Asociación Veciñal de Teis asegura ter solicitado hai varias semanas por escrito unha xuntanza co concelleiro de Fomento para tratar sobre esta humanización ( estacionamento e recuamento do muro) sen recibir resposta até o de agora.

“Desde a Asociación Veciñal de Teis observamos que en Teis hai un problema grave de falta de zonas de estacionamento. Desde o Concello, só se eliminan prazas, pero non se planifican solucións, como crear novas zonas de aparcamento ou a construción dun estacionamento soterrado”, selan.