O grupo municipal Marea de Vigo reclamou que calquera axuda ao estaleiro vigués Fillos de J. Barreras (agora propiedade de Ritz Carlton) por parte de entidades públicas, sexa a Xunta ou sexa o Goberno a través da SEPI, estea vinculada á entrada no accionariado da empresa.
O portavoz do grupo, Rubén Pérez, lamentou que a xestión do estaleiro é “desastrosa” e “absolumente opaca”, tras saberse que o cruceiro de luxo que está en construción nas súas bancadas será levado a dique seco a outro lugar para a finalización dos traballos.
“A marcha do barco e a falta de perspectivas futuras de carga de traballo son a plasmación evidente de que os novos accionistas só viñeron rematar o buque da súa propiedade e cargarlle as débedas ao estaleiro, evitando sobrecustos”, denunciou.
Marea de Vigo considera “impresentable falar de quitas ou axudas públicas cando nin sequera se liquidaron as débedas con auxiliares”, e sinalou que “a sensación xeneralizada no sector é que á fronte do estaleiro non hai ninguén, e só opera o interese de Ritz Carlton para acabar o cruceiro lejo ao menor custo”.
De feito, engadiu Rubén Pérez, en Barreras “non hai interlocutor claro” e tampouco está claro que o barco en construción vaia a regresar á bancada viguesa tras os traballos en dique seco, ou que se vaian a saldar as débedas.
Por todo iso, insistiu en que calquera quita de débeda ou axuda pública debe ir acompañada pola entrada no accionariado da administración correspondente, sexa a autonómica ou a estatal, “para dar certeza a posibles encargos e solvencia a armadores que queiran contratar no estaleiro”, e para que o persoal e os provedores teñan “un interlocutor claro”.
