O Concello de Vigo emitiu un comunicado, tras as declaracións da delegada da Xunta na área, Marta Fernández-Tapias, nas que insiste en que o Goberno que dirixe Alberto Núñez Feijóo “debe incrementar a súa achega ao festival ata o medio millón de euros, igualando a contía destinada” por Concello e Deputación.
Tras o “esforzo” económico ata os 200.000 euros reivindicado pola delegada da Xunta en Vigo, o goberno local, que dirixe Abel Caballero, subliña que, en edicións anteriores, o Executivo autonómico “tamén declarou publicamente que ía aumentar o seu apoio ao certame vigués, pero finalmente incumpriu a súa palabra e non o fixo”.
“Esiximos un apoio equivalente ao de Concello e Deputación e que, esta vez, se materialice”, remarca o comunicado, subscrito polo concelleiro de Festas e Participación Cidadá, Pablo Estévez.
“FALAR MENOS E PÓR MÁIS RECURSOS”
“Agora, de novo a Xunta e a súa delegada tomándolle o pelo á cidade. Practicamente non achegan nada a ‘O Marisquiño’ nin o apoiaron nas súas dúas décadas de historia. O que teñen que facer é falar menos e pór máis recursos, tanto como o medio millón de euros que dedicamos Concello e Deputación. ‘O Marisquiño celébrase en Vigo polo apoio de Concello e Deputación”, conclúe.
