O BNG de Vigo demandou este mércores a Xunta e Concello que deixen de utilizar a celebración do festival O Marisquiño como “arma” de confrontación partidista, e reclamou que todas as partes, incluída a Autoridade Portuaria, “se xunten” para chegar a un acordo e evitar a marcha do certame, anunciada pola organización hai uns días.

O edil nacionalista vigués, Xabier Pérez Igrexas, reclamou ás administracións que busquen un acordo de cooperación a medio prazo para garantir a continuidade do Marisquiño polo menos por catro anos e lembrou que este festival é o “principal evento internacional que se celebra na cidade”.

Por iso, fixo un “chamamento á responsabilidade” e esixiu que deixen de “xogar” co certame, porque “é o momento de que todo o mundo arrime o ombro”, e non de “poxas nin reproches”.

“Temos que despregar as luces longas cun festival de éxito e consolidado. Non podemos colocar a organización do Marisquiño cada ano na incerteza de se contarán con apoio institucional suficiente ou non”, advertiu.

Pola súa banda, o alcalde, Abel Caballero, afirmou nunha rolda de prensa este mércores que mantén “conversacións desde hai uns días” coa organización do evento e que esas “van en moi boa dirección”. “Confío en poder darlles moi pronto boas noticias”, afirmou, aínda que sen proporcionar máis detalles.