Continúan as incidencias por Karim en Vigo. Os efectos da borrasca acapararon a práctica totalidade das actuacións realizadas pola Policía Local desde a noite do venres. En concreto, ata 95 incidencias tiveron que ser atendidas polas súas unidades e polos bombeiros.

Nun comunicado, o corpo local explica que os principais episodios vividos na urbe olívica consistiron en colectores, balizamentos de obras e outros obxectos movidos polo vento. Ademais, producíronse desprendementos de chapas metálicas dos tellados diversos edificios nas rúas Marín e Tomás Alonso e na avenida Hispanidade e Balaídos. Ata estes puntos desprazáronse os bombeiros para retirar ou, no seu caso, asegurar as pezas. Tamén saíu voando, ata quedar apoiado nun farol, o toldo dun mesón na avenida de Castrelos.

Do mesmo xeito, a Policía Local recibiu chamadas relacionadas con desprendementos de fachada, coa caída parcial dun muro en Camiño do Pombal, así como incidencias por árbores e ramas nas estradas.
Precisamente, ao redor das 8,00 da mañá deste sábado, a caída dunha árbore que invadiu parte da calzada provocou danos en catro turismos estacionados na avenida Alcalde Gregorio Espino. Os axentes municipais colaboraron cos bombeiros para tallar e retirar as ramas e o tronco, ademais de informar os titulares dos vehículos sobre o ocorrido.

A Policía tamén tivo que recoller semáforos tirados ou desprendidos e pechou os accesos tanto ao aparcadoiro como ao paseo de Samil por seguridade.