A Agrupación Europea de Cooperación Territorial (AECT) Galicia-Norte de Portugal trasladou a súa preocupación polo “impacto negativo” dun novo peche de fronteiras na eurorrexión, onde só están operativos tres pasos entre Galicia e o norte luso (un deles parcialmente).

A AECT denunciou esta situación ante representantes da Comisión Europea, no marco do ‘webinar’ The role of SMEs in border regions, organizado pola Asociación de Rexións Fronteirizas de Europa.

Este organismo de cooperación transfronteirizo reclamou a reapertura do maior número de pasos posibles, garantindo os medios necesarios para que haxa un control efectivo do tránsito, á vez que lamentou que “non se aprendeu nada” das consecuencias que tivo o peche de fronteiras do ano pasado.

A AECT advertiu de que o peche de 24 dos 27 pasos existentes na eurorrexión veu a “agravar” as “negativas repercusións socioeconómicas” da pandemia de COVID-19, e apuntou que o “impacto negativo” sófreno tamén transportistas e traballadores transfronteirizos que, aínda que poden pasar entre ambos os países, deben soportar “longas colas” e dar rodeos de decenas de quilómetros.

De feito, apuntaron que o feito de abrir só tres pasos provoca “aglomeracións”, sobre todo en ‘horas punta’, e obriga a unha maior mobilidade, mesmo ao uso de coches compartidos para aforrar custos, e incidiron en que a apertura doutros pasos “non socavaría os esforzos para conter a pandemia”.