A Garda Civil desarticulou dous puntos de venda de drogas en Baiona coa detención de tres homes e a investigación dun menor de 17 anos, todos eles asociados a supostos delitos de tráfico de estupefacientes.

Segundo informou o Instituto Armado, estas detencións enmárcanse na operación ‘Burgoshop’, que comezou o pasado mes de novembro tras recibir informacións que alertaban da existencia dun piso no que se trapicheaba con drogas.

Froito das investigacións realizadas, comprobouse que o domicilio en cuestión era frecuentado por consumidores habituais de estupefacientes, algúns dos cales foron interceptados cando saían do piso en posesión das drogas adquiridas.

Como resultado, foi detido o responsable do inmoble, un home de 42 anos, e investígase ao seu fillo, menor de 17 anos, como presuntos autores de senllos delitos contra a saúde pública, por tráfico de drogas.

De igual forma, foron detidos outros dous veciños de Baiona e Oia de 41 e 50 anos de idade, respectivamente, que supostamente colaboraban na distribución e venda dos estupefacientes no garaxe dun deles.