O Consello de Goberno da Universidade de Vigo (UVigo) aprobou este luns a creación da Comunidade Alumni-UVigo, un servizo que busca “xerar un novo espazo de comunicación” que permita manter o vínculo e xerar sinerxías con egresados e outros colectivos relacionados coa universidade.
Este servizo comezará a funcionar o próximo 10 de febreiro e estará aberto a persoas tituladas pola universidade viguesa, persoal docente e investigador (PDI), persoal de administración e servizos (PAS), e alumnado de programas de mobilidade.
Ademais, poderanse outorgar recoñecementos de alumni-UVigo honorífico a persoas distintas das anteriores con méritos de excelencia; alumni-UVigo distinguido a persoas cunha especial implicación coa comunidade; e amigo de alumni-UVigo a persoas que, sen pertencer a ningunha categoría anterior, mostren o seu interese en formar parte activa da comunidade.
Os membros de Alumni-UVigo gozarán de beneficios como accións colectivas, a posibilidade de participar en actividades de extensión universitaria, uso dos servizos da biblioteca, acceso á oferta formativa ofrecida polo Centro de Linguas, servizo de orientación laboral, servizo de creación de empresas e promoción da súa marca ou imaxe.
MEDIDAS COVID-19
Noutra orde de asuntos, durante o Consello de Goberno, tamén se tratou a reclamación da representante sindical do PDI Marta Pazos, pola que solicitou que se estudasen os casos particulares de docentes que mostrasen o seu interese en impartir clase desde os seus domicilios. “Esta é unha situación puntual e pedimos que a xente poida elixir“, apuntou Pazos.
En resposta a estas reivindicacións, o reitor da UVigo, Manuel Reigosa, puxo en relevo que a incidencia do covid-19 na UVigo está “bastante por baixo do que se rexistra en Galicia” e “a maior parte dos casos producíronse fóra da institución”, polo que considerou que “agora hai máis razóns para que o profesorado vaia aos centros”.
“Ademais da docencia, temos outras obrigacións de investigación ou xestión e como servidores públicos non se pode dar unha imaxe desenfocada e temos que dar exemplo“, remarcou Reigosa, que a continuación manifestou que “se estudarán todos os casos e, de haber perigo real, alcanzarase unha solución”.
