O xulgado de Instrución número 2 de Ponteareas decretou o ingreso en prisión provisional, comunicada e sen fianza do home detido o pasado fin de semana pola súa presunta vinculación coa morte doutro home nun hostal da localidade de Mondariz.

Segundo informaron fontes do Tribunal Superior de Xustiza de Galicia (TSXG), o xulgado ordenou o ingreso en prisión para este home, que está a ser investigado como presunto autor dun delito de homicidio ou asasinato, pendente de cualificar en función de como avance a instrución e dos indicios que se vaian acreditando.

Dáse a circunstancia de que o detido por estes feitos tamén se aloxaba no hostal e era veciño de habitación da vítima.

O falecido levaba varios días desaparecido, polo que a Garda Civil emprendeu unha procura que lle levou ata o hostal onde vivía. Unha vez alí, os axentes atopáronse con manchas de sangue tanto no exterior da porta como no interior da súa habitación e, tras inspeccionar as instalacións, localizaron o corpo no soto.