Catorce falecementos por Covid-19 notificados este domingo elevan a 1.622 as vítimas mortais que se cobrou a pandemia en Galicia desde o seu inicio no primeiro trimestre de 2020.

Do total de decesos comunicados polo Servizo Galego de Saúde, cinco rexistráronse no CHUAC, na Coruña, catro homes de 67, 77, 79 e 83 anos e unha muller de 86.

En centros sociosanitarios, morreron unha muller de 56 anos na  Pai Menni de Betanzos, unha muller de 87 na  DomusVi de Carballo e unha muller de 86 na  DomusVi de Vimianzo.

Tamén morreron tres persoas no CHOP, en Pontevedra. Eran tres homes de 55, 81 e 87 anos. No  CHUO, en Ourense, morreu un home de 67 anos, e outro home de 86 no hospital de Verín, procedente do asilo Hogar Santa María. Así mesmo, no  CHUVI, en Vigo, morreu un home de 68 anos.
Todas estas persoas tiñan patoloxías previas, segundo indica o Sergas.