A Xunta e os concellos de Vigo e Ferrol defenderon este sábado os recursos que teñen dispoñibles para o resgardo de persoas sintecho durante ondas de frío como a desta semana, despois de que este venres transcendese a morte dun home que vivía na rúa na cidade olívica.
En concreto, o falecido era un home de 47 anos nado en Senegal que, segundo informou o goberno local de Vigo nun comunicado, recibía habitualmente asistencia por parte dos servizos sociais municipais aínda que “sempre foi remiso” a eles.
Precisamente, un día despois de coñecerse este caso, a Xunta lembrou que existen máis de 300 prazas na rede de albergues da Comunidade galega para acoller a persoas sen fogar ante a onda de frío que afecta á Península Ibérica, con temperaturas que alcanzan valores negativos durante a noite.
Nun comunicado emitido este sábado, o Goberno autonómico sinalou que a maior parte destes centros contan con servizos de “restauración, aloxamento e orientación profesional, así como de aseo persoal, lavandaría e atención e acompañamento social”. Así mesmo, o Concello de Ferrol tamén informou da activación dun plan especial durante a madrugada do sábado para localizar a persoas que dormen na rúa.
En total foron atendidas cinco persoas, das cales, unha foi trasladada a unha pensión, outra a casa dun familiar e outro tres “rexeitaron o aloxamento”. No despregamento, que continuará na noite do domingo, participaron 12 efectivos da agrupación de voluntarios de Protección Civil.
