O Ministerio de Transportes destacou que traballa para que a rebaixa das peaxes da AP-9 entre en vigor no primeiro semestre de 2021, co obxectivo de que os descontos se prolonguen ata o ano de finalización da concesión –2048– e supoñan unha media de aforro de 100 euros ao mes para os usuarios.
Así o indicou este mércores o secretario xeral de Infraestruturas do ministerio, Sergio Vázquez, en declaracións á Cadena Ser recollidas por Europa Press. “Será cuestión duns meses. É importante que estea ben apontoado para que sexa con vocación de permanencia, porque a prórroga que se deu no ano 2000 fai que teñamos que vivir neste réxime de concesión ata 2048″, sinalou.
Na súa intervención, o responsable de Infraestruturas destacou que se trata dunha rebaixa “histórica” que vai beneficiar ao “peto dos usuarios galegos”. “Estamos a falar de rebaixas nos usuarios frecuentes que poden superar os 100 euros ou máis ao mes”, indicou.
Ademais, Sergio Vázquez indicou que os descontos estarán en vigor non só este ano senón nos anos “vindeiros” xa que o obxectivo é que se manteñan ata 2048, cando finaliza a concesión. “Estamos a traballar nun sistema de bonificacións que non só vai ser para un ano… O que queremos é que dure toda a vida da concesión, estamos a falar de 2048”, incide.
