A Consellería de Sanidade notificou este mércores o falecemento de sete persoas con coronavirus na comunidade, co que a cifra de vítimas mortais da pandemia ascende a 1393. Tres delas morreron en Vigo.
Segundo a información achegada polo departamento sanitario galego, na última xornada tamén faleceu unha muller de 94 anos e outra de 93 no Hospital de Vigo, a última delas procedente da residencia CRAPD-II. En Povisa, tamén na cidade olívica, morreu unha muller de 89 anos.
Por outra banda, tamén faleceu un home de 84 anos ingresado no Clínico de Santiago e unha muller de 76 anos que permanecía no seu domicilio, tamén na área sanitaria de Santiago, concretamente no municipio de Touro.
Finalmente, as dúas últimas vítimas mortais son un home de 76 anos ingresado no Hospital de Ferrol e outro home de 75 ingresado no Hospital de Pontevedra.
