O alcalde de Vigo, Abel Caballero, asegurou que a crise do estaleiro Barreras está “moi preto da solución” e reclamou ao presidente da Xunta, Alberto Núñez Feijóo, e o seu goberno que deixen “de pór paus na roda” e de “interferir” nun conflito “no que non achegaron nada”.
Así se pronunciou o rexedor nun acto organizado polo concello vigués con motivo do día da Constitución española.
Alí, Caballero referiuse ás palabras do presidente autonómico nas que expresou que espera que a SEPI apoie o plan de financiamento do estaleiro vigués.
O alcalde asegurou que a “solución” para Barreras “está moi preto” grazas ao “diálogo” mantido polo concello co Goberno central, o estaleiro e a SEPI ao longo dos últimos meses.
“Estamos moi preto dunha solución e nese diálogo non achegou nada a Xunta”, espetou Caballero, que censurou o “oportunismo” de Feijóo, ao que acusa de ser “o responsable” da situación actual do estaleiro vigués debido ao acordo coa petroleira Pemex.
“Feijóo condenou a Barreras á desaparición e hoxe estase salvando coa Xunta sen achegar nada”, espetou Abel Caballero.
RAMPLAS DE GRAN VÍA
Por outra banda, o alcalde tamén se pronunciou sobre “o gran novo éxito da cidade”, en referencia ás ramplas da Gran Vía de Vigo que, segundo Caballero, están a supor “un éxito estético, arquitectónico” e tamén “funcional” porque eliminan as pendentes “de ata o 12%” que hai nesta rúa, unha das principais arterias da urbe.
Neste sentido, celebrou a “acollida excepcional” das pasarelas “por todo o mundo menos polo PP”, formación á que acusou de actuar con “caradura política” por pedir a ampliación destas estruturas ata a Praza de España “cando foi Feijóo quen o impediu”.
Así, prometeu que chegarán a esta praza coa redacción dun novo proxecto “porque o anterior o parou Feijóo para amolar esta cidade”.
