A expsicóloga do F.C. Barcelona, Inma Puig, participou este mércores no ciclo ‘Coloquios en tempo de pandemia’, organizado pola Universidade de Vigo e a Fundación Mentor, cun relatorio por vía telemática sobre a xestión do talento.
Puig, que traballou na xestión de emocións e conformación de equipos de traballo con deportistas de elite e co persoal do restaurante Celler de Can Roca, advertiu de que “o éxito pode danar”, por iso avogou por saber xestionar as emocións, especialmente en momentos como o actual de pandemia, e tamén “aprender a xestionar o éxito”.
Nese sentido, apuntou á necesidade dunha revolución emocional, sen a cal as demais revolucións, como a tecnolóxica, “non servirán de nada”. Esta psicóloga recalcou a importancia de “escoitar” e de “coidar” na vida persoal e profesional, porque “se se perseguen resultados, hai que coidar ás persoas.
Finalmente, convidou aos alumnos que participaron na charla a non coartar a súa creatividade, a centrarse no que queren e en como queren que sexa a súa vida, para chegar ao final das súas carreiras profesionais “facendo todo” o que querían facer.
