Un total de 18 empresas auxiliares acredoras de Fillos de J. Barreras confirmaron que presentarán unha demanda conxunta para reclamar o cobro da débeda contraída tras constar que o estaleiro “non cumpre” o pactado.
Nun comunicado, a industria auxiliar integrada na sociedade Uninaval criticou que este estaleiro vigués contratase a novos provedores a pesar de que aínda non outorgou “garantías de cobro do restante 50% da débeda inicial do ‘Evrima'”, tal e como “comprometeu” no acordo asinado.
Ademais, sinalou que non se percibiu ningunha parte dos honorarios correspondentes aos traballos realizados nos proxectos encargados no seu momento por Havila e Armas.
Uninaval lembrou que parte das empresas retomaron a actividade en Barreras e pactaron novas condicións de cobro e facturación para os novos traballos. No entanto, criticou que os prazos de pago e de tramitación de pedidos acordados coa nova dirección Barreras “estean a incumprirse”.
Neste sentido, asegurou que, a principios de outubro, a empresa solicitou “tempo” para trasladar “novidades que mellorarían a súa situación e a súa previsión de cobro”. Con todo, a industria auxiliar agrupada en Uninaval lamentou que, “máis dun mes despois”, non se produciu “ningún avance sobre a débeda inicial pendente de pago” e acumuláronse “novos atrasos e riscos nos traballos actuais”.
Así as cousas, as auxiliares retiraron persoal de estaleiro “para non incrementar máis o seu risco“, o que provocou que Barreras comezase a contratar a novos provedores “sen resolver débedas anteriores”.
Así mesmo, Uninaval detallou que, na actualidade, Barreras realiza “pagos parciais da nova débeda xerada” e paga “só ás empresas que necesita para continuar co estado actual da obra”.
Ante esta situación, que cualificou como “insustentable” dada a crise, resaltou que “é complexo pechar contratos” e as empresas “necesitan liquidez”. Por iso, pediu “seriedade” ao estaleiro, co que as auxiliares foron “tremendamente flexibles e comprensivas” e cuxa “viabilidade” apoiaron “nos seus momentos máis difíciles“.
