O alcalde de Vigo, Abel Caballero, reiterou este luns que a cidade está “a frear a pandemia” e conseguiu “dobrarlle o pulso” á COVID, aínda que incidiu en que hai que “manter a prudencia” e as medidas de prevención.
Nunha rolda de prensa, o rexedor olívico recalcou que a incidencia do virus cada 100.000 habitantes nas últimas dúas semanas mantén unha “lixeira tendencia decrecente”, e apuntou que, segundo os últimos datos, esa incidencia é de 343,7 por cada 100.000 habitantes na cidade de Vigo (e de 355,6 na área sanitaria).
O alcalde volveu a reclamar un incremento no número de probas PCR e de rastrexadores, e lembrou que “hai que seguir tendo moita prudencia”. Respecto diso, lembrou que “haberá que seguir un tempo así”, pero que a “boa noticia” da pronta distribución de vacinas fai que se “empece a ver a luz no horizonte”.
Segundo a actualización de datos da pandemia realizada polo Sergas, na área sanitaria de Vigo hai 2.260 casos activos de COVID (60 menos que os notificados o domingo), e o número de persoas hospitalizadas é de 99 (dez máis que hai 24 horas), das que 25 están en Unidades de Coidados Intensivos.
Por outra banda, Abel Caballero informou de que, o pasado fin de semana, a Policía Local de Vigo identificou a 366 persoas e inspeccionou 544 vehículos. Os axentes tramitaron 43 propostas de sanción, na maior parte de casos a persoas que non levaban posta máscara ou que non respectaron o ‘toque de queda’.
