Os positivos confirmados por Covid-19 nas últimas 24 horas en Galicia han repuntado a 682, deles 172 na área sanitaria de Vigo –que se sitúa á cabeza con maior número de casos activos tamén– e 100 na da Coruña e Cee.

En canto aos casos activos, a área sanitaria de Vigo sitúase á cabeza, con 1.502, tras sumar 144 máis con respecto a este martes; seguida da de Ourense, con 1.414 –nove menos–, que é a única na que descenden en Galicia. Mentres, a área da Coruña colócase con 1.285 casos activos –84 máis–; a de Santiago e Barbanza conta con 1.186 –58 máis–; a de Pontevedra e O Salnés, con 785 –58 máis–; Lugo, con 743 –52 máis– e a de Ferrol ten 620 –74 máis–.

Así se reflicte nos datos actualizados na mañá deste mércores na web da Consellería de Sanidade con cifras ata as 18,00 horas deste martes, nas que se constata que esta segunda onda rexistra as cifras máis elevadas de contagios da pandemia en Galicia en canto a positivos confirmados por PCR en 24 horas.

HOSPITALIZADOS

Por outro lado, segundo os últimos datos ofrecidos pola Consellería de Sanidade, a área de Vigo conta cun total de 67 pacientes con Covid-19 hospitalizados –un máis–, dos cales oito permanecen en UCI, un máis dende onte e 59 noutras unidades de hospitalización –sen cambios–. Ante estas circunstancias, o concello olívico permanece en alerta vermella.