O alcalde de Vigo e presidente da Federación Española de Municipios e Provincias (FEMP), Abel Caballero, anunciou este mércores que a cidade disporá de 80 millóns para investir no que queda deste ano e o ano que vén, tras a liberación dos remanentes anunciada pola ministra de Facenda, María Jesús Montero.
En declaracións remitidas aos medios, o rexedor olívico proclamou que a decisión de “permitir aos concellos que gasten os seus aforros” é unha “gran noticia” para Vigo, “a mellor” desde que el é alcalde da cidade, e apuntou que esa “decisión excepcional” permitirá á administración municipal investir 80 millóns de euros nos próximos 15 meses.
Segundo indicou, o goberno local xa está a redactar os proxectos para investir ese diñeiro (humanizacións, novas zonas deportivas, espazos verdes, etc.), e lembrou que, grazas ao seu acordo como presidente da FEMP co Goberno, as entidades locais poderán ter “o que o PP lles negou no Congreso”, á vez que avanzou que seguirá dialogando co Executivo para lograr máis fondos.
Caballero, quen proclamou que Vigo será a cidade que teña “máis desenvolvemento de investimento e recuperación económica” de todo o ámbito español, agradeceu a decisión ao Goberno de España, e constatou que Pedro Sánchez “está a ser un gran presidente para esta cidade”, desbloqueando actuacións como o AVE, o estudo sobre a auga ou o do saída sur ferroviaria.
“Quero que esteamos satisfeitos polo que acaba de facer o Goberno, porque lle acabamos de dobrar o pulso ao PP, ao BNG e a Ciudadanos que non querían que puidésemos gastar os nosos aforros”, sentenciou.
ATENCIÓN PRIMARIA
A corporación municipal de Vigo instou á Xunta a dotar dos medios e o persoal necesarios á Atención Primaria nun pleno celebrado este mércores.
Así, a moción contou co apoio dos edís do PSOE, Marea de Vigo e o BNG e a abstención dos do PP. Durante a súa intervención, o portavoz do Grupo Municipal Socialista, Carlos López Font, asegurou que a pandemia agravou os problemas que presentaba a Atención Primaria.
Ademais, López Font acusou ao Goberno galego de buscar que os sanitarios asuman o labor dos rastreadores, o que, segundo denunciou, leva unha sobrecarga de traballo para estes profesionais.
Pola súa banda, a edila do Grupo Municipal Popular Teresa Egerique valorou o traballo realizado “de modo transversal” polas consellerías e os recursos postos a disposición da sanidade para dar resposta á pandemia.
Mentres, o portavoz de Marea de Vigo, Rubén Pérez, avogou pola reapertura das consultas presenciais e a creación de circuítos diferenciados para pacientes con COVID-19 en centros de saúde. Ademais, o concelleiro do BNG, Xabier P. Igrexas, acusou ao Goberno galego de adoptar unha estratexia que non pasa por apoiar a sanidade pública, o que, ao seu xuízo, produce unha sobrecarga de traballo.
Adicionalmente, o pleno deu luz verde a unha moción do edil do BNG que demanda a apertura dunha comisión de investigación no Parlamento de Galicia sobre a xestión da pandemia nas residencias de maiores e centros de discapacitados. Do mesmo xeito, solicítase que se adopten as medidas necesarias para articular un modelo atención ás persoas maiores baseado nunha aposta pola xestión pública.
OUTRAS MOCIÓNS
Noutra orde de cousas, a corporación municipal aprobou unha moción mediante a que se reclamou á Xunta que dote de máscaras aos estudantes con menos recursos dada a súa obrigatoriedade para acceder aos centros escolares.
Así mesmo, os concelleiros do PSOE, Marea de Vigo e o BNG apoiaron unha moción mediante a que se instou ao Goberno galego a solucionar a situación dos comedores escolares xestionados por Anpas, que aínda non foron postos en marcha ante a necesidade de adoptar medidas excepcionais pola COVID-19 que encarecen o servizo.
