O colexio privado O Castro British School de Mos abrirá as súas aulas esta semana tras confirmarse que todos os casos sospeitosos de COVID do seu persoal deron negativo nas probas realizadas o fin de semana.
Segundo comunicou o propio centro educativo, tras detectarse unha vintena de casos sospeitosos de coronavirus nas probas serolóxicas, optouse por iniciar as clases de forma telemática este luns para os alumnos de Secundaria e Bacharelato.
No entanto, tras a realización das probas PCR o pasado fin de semana, informaron desde o colexio, todos eses casos resultaron ser “falsos positivos” e confirmouse que ninguén do persoal está afectado.
Por iso, O Castro British School abrirá as súas portas para a volta ás clases presenciais, despois de que este luns se completou o labor de desinfección das instalacións. Así, o mércores incorporaranse os alumnos de Secundaria e Bacharelato, mentres que o xoves farano os de Infantil e Primaria, segundo informou o director do colexio, Dominic Abbott.
A dirección do centro lamentou que “unha medida preventiva” realizada con “o único obxectivo de dotar dunha maior seguridade unha complicada volta ao cole”, puidese “xerar maior incerteza”, e quixo trasladar ás familias unha “mensaxe de tranquilidade”.
Finalmente, O Castro British School subliñou que todo o seu equipo está “a traballar duro” para facer fronte ás posibles situacións que poida deparar a pandemia de COVID, co fin de ofrecer aos alumnos as “máximas garantías” e, aínda que o regreso presencial ás aulas é “o escenario desexado para todos”, tamén están preparados “para dar continuidade á educación dos alumnos en modalidade ‘en liña’ se fose preciso”.
