A Policía Nacional trata de esclarecer as circunstancias do falecemento dunha persoa cuxo cadáver foi atopado este sábado nunha leira abandonada de Vigo. En concreto, segundo informa o 112, foi unha persoa particular quen chamaba á central de emerxencias sobre as 19,30 horas para indicar que acababa de atopar a unha persoa tirada no chan nun recinto da rúa Ribadavia.

Con estes datos, o 112 avisou a Urxencias Sanitarias-061, que á súa vez solicitou a colaboración das forzas da orde, dado que a persoa achada podía estar falecida.

Así, tamén foron informados dos feitos os axentes da Policía Nacional e Local. Tras confirmar que se trataba dun corpo sen vida, os corpos de seguridade traballan para esclarecer os feitos.