Galicia volveu experimentar unha nova repunta dos casos activos de Covid-19 este sábado, no que a cifra total sobe a 196, 16 máis que o pasado venres, segundo os datos facilitados pola Consellería de Sanidade.

A área sanitaria con máis casos é a de Lugo, con 80 activos, mesma cifra que no parte do día anterior. A Coruña, con 52 casos, é a área sanitaria na que máis crecen os activos con nove máis respecto ao venres.

Así mesmo, Vigo ten 32, un máis que o venres e na área sanitaria de Pontevedra están activos 15 casos de COVID-19 –catro máis que este xoves–. 

Pola súa banda, os dous casos detectados en Barbadás fan subir a oito os activos en Ourense, mentres que o resto de área sanitarias non presentan cambios respecto ao venres: Santiago ten 11 e Ferrol segue libre de Covid-19.

Segundo a información de Sanidade, o número de persoas hospitalizadas mantense nas 10 que había o venres, un deles na UCI –desde o pasado domingo non había ningún–. Un total de 185 afectados están no seu domicilio.

Ata o momento, Galicia rexistra 11.211 persoas curadas e 619 falecementos. A cifra de mortes por coronavirus permanece sen variación desde o 10 de xuño.

En canto ás residencias, a situación está igual que o venres, cando o Sergas notificou o caso dunha traballadora unha residencia de Xove que, segundo fontes próximas, contaxiouse, do mesmo xeito que outros familiares, por unha visita procedente de Cataluña.