A Policía Autonómica da Xefatura de Vigo detivo a un home na cidade olívica despois de que, supostamente, agredise á súa parella, que tivo que refuxiarse xunto ao seu fillo na vivenda dun veciño.
Segundo recolleu nun comunicado a Vicepresidencia e Consellería de Presidencia, Administracións Públicas e Xustiza, os feitos tiveron lugar este mércores, cando os axentes foron alertados que podía cometerse un delito de violencia de xénero na urbe olívica.
Tras desprazarse ao domicilio da vítima, os policías detiveron ao presunto agresor, que se atopaba baixo a influencia de bebidas alcohólicas, pola suposta comisión dun delito de violencia de xénero.
Mentres, os axentes comprobaron que a muller se refuxiou xunto ao seu fillo na vivenda dun veciño. Tamén observaron que a vítima presentaba unha ferida nun pé e hematomas nos brazos, aínda que declinou recibir asistencia médica.
Así mesmo, os funcionarios tramitaron as correspondentes dilixencias na Comisaría da Policía Nacional de Vigo. En concreto, a protección dun total de 253 vítimas de violencia de xénero está asignada á Policía Autonómica.
