Unha muller foi evacuada nun helicóptero medicalizado, mobilizado por Urxencias Sanitarias de Galicia-061, despois de caer desde unha altura na súa casa e impactar contra un muro na parroquia de Angoares, no municipio de Ponteareas.
Segundo informou o 112 Galicia, tras recibir a alerta a través dos servizos sanitarios, sobre as 10,05 horas, por parte do CIAE púxose a situación en coñecemento da Policía Local, da Agrupación de Voluntarios de Protección Civil da localidade, dos GES e Bombeiros de Ponteareas e da Garda Civil.
Fontes do Instituto Armado relataron que cando se atopaba na zona da piscina na súa vivenda, na que tamén estaba o seu marido, baixou unhas escaleiras, sen varanda, caeu e queixábase de dores nas costas.
Ao lugar o 061 enviou un helicóptero medicalizado con base en Ourense para atender á muller B.P.M. de 62 anos, que foi trasladada na aeronave ao Hospital Álvaro Cunqueiro (HAC) de Vigo, confirmaron fontes sanitarias.
